Мектеп директорының ата-аналарға есебі

Шу ауданы білім бөлімінің Әлия Молдағұлова атындағы орта мектебінде «Адал азамат» біртұтас тәрбие бағдарламасы аясында қамқоршылық кеңес алдында есеп беру жиыны және жалпы мектепішілік ата-аналар жиналысы өткізілді.

Жиналысқа мектеп әкімшілігі, қамқоршылық кеңес мүшелері, ата-аналар қатысты. Жиналыстың негізгі мақсаты – оқу жылының қорытындыларын саралау, оқушылардың қауіпсіздігін қамтамасыз ету және алдағы мемлекеттік емтихандар мен жазғы демалыс кезеңіне байланысты маңызды мәселелерді талқылау болды.

Жиында мектеп директоры А. Е. Тогузаков сөз сөйлеп, оқу жылы барысында атқарылған жұмыстар бойынша қамқоршылық кеңес алдында есеп берді. Сонымен қатар, мектеп өміріндегі жетістіктер мен тәрбие бағытындағы атқарылған жұмыстарға тоқталып, ата-аналармен бірлескен жұмыстың маңыздылығын атап өтті.

Мектеп директоры алдағы мемлекеттік емтихандардың ұйымдастырылуы, оқушылардың емтихан кезіндегі жауапкершілігі, жаз мезгіліндегі қауіпсіздік шаралары және оқушылардың жазғы демалысын тиімді ұйымдастыру мәселелеріне кеңінен тоқталды. Сондай-ақ ата-аналарды балалардың бос уақытын қадағалап, олардың қауіпсіздігіне ерекше мән беруге шақырды.

Жиналыс барысында директордың тәрбие ісі жөніндегі орынбасары Ш. С. Илкибаева сөз алып, құқық бұзушылықтың алдын алу бағытында түсіндірме жұмыстарын жүргізді. Әсіресе мектеп бітіруші түлектердің ата-аналарына кешкі мезгілдегі қауіпсіздік, заң талаптарын сақтау, қоғамдық тәртіпті бұзбау мәселелері бойынша нақты ақпараттар берілді.

Сонымен қатар жаз мезгілінде балалардың қауіпсіздігін сақтау мақсатында:

судағы қауіпсіздік;

өрт қауіпсіздігі;

жол қозғалысы ережелері;

әлеуметтік желілерді, оның ішінде Facebook және басқа интернет платформаларын дұрыс пайдалану мәдениеті жөнінде түсіндірме жұмыстары жүргізілді.

Жиналыс соңында мектеп директоры А. Е. Тогузаков оқу жылы бойы мектеппен тығыз байланыста жұмыс жасап, бала тәрбиесіне жауапкершілікпен қараған ата-аналарды Алғыс хатпен марапаттады.Сонымен қатар жас ұрпақтың сапалы білім мен саналы тәрбие алуында отбасы мен мектеп арасындағы ынтымақтастықтың маңыздылығын ерекше атап өтті.

«Бала тәрбиесі – баршамызға ортақ іс».